2021-jıl 5-noyabr, Qaraqalpaqstan Respublikası Shımbay rayonı. 2021-jıldıń 3-4 hám 5-noyabr kúnleri YAponiya hám Qırǵızstan ekspertleri Qaraqalpaqstannıń úsh rayonında bolıp ótip atırǵan “Bir awıl bir ónim (OVOP) tiykarları” temasındaǵı biznes-trening sheńberinde kishi hám orta kárxanalardı rawajlandırıw boyınsha ózleriniń tabıslı tájiriybeleri menen ortaqlastı. Ilaj YAponiya húkimeti tárepinen qarjılandırılıp atırǵan BMSh Rawajlanıw baǵdarlaması hám YUNFPAnıń “Aralboyı regionında qorshaǵan ortalıqtıń buzılıwı aqıbetinde kelip shıqqan densawlıq, ekologiyalıq hám ekonomikalıq qáwipsizlikke qarsı jergilikli jámiechiliktiń turaqlılıǵın arttırıw” birgeliktegi baǵdarlaması sheńberinde shólkemlestirilmekte.
“Bir awıl, bir ónim” joybarı regionallıq rawajlanıw ushın arnawlı mólsherlengen strategiyalıq háreket bolıp, birinshi ret Yaponiyada baslanǵan. Bul kózqarastıń ózine tánligi tek jergilikli resurslardan paydalanǵan halda ónimlerdi anıqlaw hám keyin ala islep shıǵarıw, qadaqlaw hám etiketka dizaynın islep shıǵıw arqalı aymaqtıń ekonomikalıq rawajlanıwına erisiw imkaniyatında bolıp esaplanadı.
Treningtiń tiykarǵı maqseti “Bir awıl bir ónim” kózqarasın, sonıń ishinde, OVOP háreketiniń tariyxın tanıstırıw, sonday-aq, bar jergilikli resurslardan paydalanǵan halda ónimler islep shıǵarıw usılların, ónimdi alǵa qoyıw, sapa qadaǵalawı, brending hám basqa da máselelerdi dodalawdan ibarat. Seminar trenerleri JICA OVOP (YAponiya xalıqaralıq birge islesiw agentligi) joybarı sheńberinde dúzilgen “Bir awıl – bir ónim+1” jámietlik awqamınıń wákilleri bolıp, oǵan Qırǵızstandaǵı JICA OVOP joybarınıń bas másláháchisi Xaraguti Akixisa onlayn basshılıq etedi hám basqaradı.
Joybarda Bozataw, Qońırat hám Shımbay rayonlarınan 45 qatnasıwshı kishi hám orta biznes hám isbilermenlikti rawajlandırıw boyınsha óz kónlikpelerin arttırıw ilajında qatnaspaqta. OVOP qatnasıwı hám qurallarınıń engiziliwi jergilikli xalıqtıń, sonıń ishinde, hayal-qızlar hám jaslardıń biznesti júrgiziw hám rawajlandırıw boyınsha bilimlerin arttırıw, qosımsha qunlı ónimlerdiń sapasın jaqsılaw, jergilikli biznestiń ishki hám xalıqaralıq bazarlarda jáne de ózine tán hám básekige shıdamlı bolıwına járdem beriwi, nátiyjede biznestiń rentabelligi artıwı kútilmekte.
Bunnan tısqarı, trening qatnasıwshıları Qırǵızstanda OVOP háreketiniń rawajlanıwı úlgisin kóriw, real ónimler menen tanısıw, OVOP haqqında tikkeley maǵlıwmat alıw hám tikkeley ámeliyachılardan sorawlar menen usınıslar beriw imkaniyatına ie boldı. Ushırasıw sońında qatnasıwshılar birgelikte qolda bar jergilikli resurslardan paydalanǵan halda ónim islep shıǵarıw arqalı Aralboyı regionınıń ekonomikalıq potencialın OVOP usılında rawajlandırıw boyınsha “aqılıy hújim” ótkeredi.
